Seyo Nacional pa Artesania Aruba

Home
/
News
/
Seyo Nacional pa Artesania Aruba

Artesania ta e ehempel bibo di homber y muhe cu balor y habilidad, capaz di uni un gran variedad di expresion y recoge e sentimento di un pueblo pa medio di nan ofishi.

Introduccion

Ora ta papia di artesania nos ta referi na e producto cu ta traha completamente manual y of cu ayudo minimal di instrumento/herment. Por uza herment mecanico bou di e condicion cu e aporte di e artesano ta e componente di mas importante den e producto final.
Ta traha e obra cu materia prima y por produci esaki na cantidad limita. E productonan por tin un balor simbolico di uzo, estetico, artistico, creativo, cultural, decorativo, funcional, tradicional y den cual ta representa e aspectonan cultural, historico, geografico di e propio pais.

Artesania di Ana Luidens

Artesania Lina Sarmiento

Proceso pa aplica

E artesano por acudi na Departamento di Cultura Aruba y pidi pa un formulario di aplicacion. Peticionario mester entrega e formulario di aplicacion yena hunto cu un copia di un identificacion di Aruba valido y e producto(nan) cu e directiva di e Comision di Seyo Nacional pa Artesania di Aruba mester certifica. E artesano ta ricibi, dentro di diestres dia di trabou, un confirmacion di recepcion di e peticion. Den caso cu e peticion no ta completo lo no entrega esaki na e comision, sino lo tuma contacto cu e artesano cu e solicitud pa agrega e informacion cu falta.

Criterio

E motivacion pa Seyo Nacional ta pa introduci un seyo pa henter e disciplina cultural, pa bini cu un exigencia di calidad pa tur producto di artesania. E exigencia di calidad ta sosode sin embargo cu aplicacion di criterio specifico. E criterionan pa bin na remarca pa un seyo di artesania nacional ta como lo siguiente:

– Traha na man (no cu mashin, pero cu herment manual senciyo).
– Autentico, diseño original.
– Consistencia den (re) produccion di diseño y modelo.
– E producto mester ta traha na Aruba.
– Grado di uzo di material local.
– Grado cu e producto ta refleha tecnica di artesania tradicional.

E reglamento di incentivo y beneficio ta encera:
A base regular lo tin tayer pa artesano registra. Mercadeo pa producto seya ta gratis. No ta bay tin un Tienda di artesania specifico’, sino un ‘Tienda di herencia cultural’, den cual, entre otro, lo tin artesania.

Lo organisa diferente evenemento cultural den transcurso di aña.
Crea un ‘database’ / banco di dato di tur e artesanonan certifica. Esaki lo brinda e oportunidad pa acerca nan pa nan bende nan productonan.

Cu asistencia di ATA y AHATA lo duna publicidad na e producto local por medio di e Seyo Nacional, den e caso specifico aki na e artesania.

Conclusion: mediante un seyo pa artesania pa producto cultural por crea condicion pa entre otro brinda e productonan di artesania local un miho posicion riba mercado.
Esaki lo aumenta tambe e nivel di calidad di e producto local.

Protocol di verificacion

Tin condicion mara na e certificacion. Esaki ta como lo siguiente:
– E certificacion ta mara na e entidad y no ta traspasabel (esta no por pas’e pa otro). Ta trata den caso aki di un entidad personal.
– E certificacion ta valido pa un periodo limita di dos aña.

Exactamente un aña despues di haya e declaracion di certificacion, un control intermedio lo tuma luga. Esaki ta menos exigente cu esun inicial, pero si ta aplica e 6 puntonan di e lista di criterio.
E comision por yama e persona incindentalmente (aki aya) pa un control di prueba pa mira si nan ta cumpli ainda cu e exigencia di e certificacion. A base di e resultado di evaluacion di control e comision di apelacion por dicidi pa suspende e certificacion of anula esaki. Suspension ta sosode, si durante e verificacion resulta, cu no ta cumpli cu mayoria di e exigencianan di calidad. Prome cu implementa e suspension e artesano ta haya cierto periodo ainda pa cumpli cu e exigencianan. Den caso cu no haci esaki e comision ta hala e certificacion aden. Halamento di e certificacion aden ta sosode ora cu e comision constata mal uzo di reglamento di incentiva y beneficio.

George Palm yuwana

Nos Artesania

Ehempel Seyo Nacional pa Artesania