Competencia Hubenil Gang Di Arte Aruba 2015 cu e tema Fiesta.

E preparacionnan pa e competencia di mas dushi y mas gusta di Aruba a cuminsa cu hopi positivismo y energia y manera ta custumber e hobennan ta keda asombra nos cu nan genialidad y talento. Riba diamars 28 di juli pa 7’or di anochi a tuma luga na Cas di Cultura e final di e Competencia Hubenil Gang di Arte Aruba 2015.

Manera planea e hobennan a pasa un proceso di preparacion masha ameno, educativo y interesante mes. Nan a cuminsa den e proyecto di ‘Dream, Dare, Do’, organisa pa Popcorn Club na unda nan a drenta den e ambiente y e energia cu arte ta ofrece.

Despues di esaki e hobennan a cuminsa formula nan ideanan pa nan presentacion final cu e tema oficial di e aña cu tabata esun di ‘Fiesta’ y pa despues nan sigui cu e tayernan cu e docentenan hoben, esta Joshua Duf Gonsalves, Taiisia Alleyne, Jeanedy Semeleer, Samantha Trinidad, Germille Geerman, Fatme Faarup-Rigaud y Anuar Habibe.

A ofrece e tayernan aki na cada participante pa asina nan por a traha riba diferente aspecto manera; concepto fuente di inspiracion, improvisacion, traha den team, exploracion y sensibilisacion, expresion corporal, uzo di lenguahe corporal, tecnica di presentacion y presentacion riba stage. Tur esaki cu e meta pa nan haya tip valioso cu mester tene na cuenta den nan concepto y mehoracion di nan presentacion final. E proyecto aki ta auspicia pa Ministerio di Cultura Aruba y Seccion di Implementacion di Departamento di Cultura Aruba a ehecut’e. Di tal manera a uni forsa, hunto cu e proyecto di ‘Dream, Dare, Do’ y tambe cu sosten di Academy of Fine Arts & Design Aruba, na unda e tayernan a tuma luga.

Ta di remarca cu e proyecto di 2015 ta di 9 edicion y ta dirigi riba hoben entre 13 cu 21 aña di edad y ta crea pa motiva y stimula participacion di e hobennan pa nan demostra nan creatividad artistico. E ta un proyecto hubenil cu a crea na Aruba, inspira riba e proyecto Hulandes Kunstbende cu tin e mesun meta y obhetivo. E proyecto ta ofrece oportunidad pa hoben profila nan talento riba un escenario cu condicion tecnico profesional. E proyecto Gang di Arte tur aña ta hiba un tema specifico na unda e hobennan lo traha nan obranan artistico, propio y original y nan ta presenta esaki dilanti di un hurado cu ta evalua e obra den su totalidad.

E presentacion mester ta uno completamente original y traha pa e hobennan mes. E ganadonan di e competencia aki tin e oportunidad di representa Aruba den e intercambio cultural entre otro na Kunstbende Hulanda, Corsou y tambe nan ta representa e cara di e hubentud talentoso aki na Aruba.